ADMİU-nun Kitabxana-informasiya Mərkəzinə Azərbaycan Kinematoqrafçılar İttifaqı tərəfindən yeni nəşr olunmuş “Azərbaycan kino sənəti tarixi” və “Həsən Seyidbəyli: şəxsiyyət və yaradıcı” adlı kitablar hədiyyə olunub. Hər iki nəşrin layihə rəhbəri görkəmli dramaturq və kinorejissor Rüstəm İbrahimbəyovdur.
Azərbaycan Demokratik Respublikasının 100, Azərbaycan kinosunun 120 illik yubileyinə həsr olunmuş dördcildlik “Azərbaycan kino sənəti tarixi” kitabının müəllifi tanınmış nasir və ssenariçi Nəriman Əbdülrəhmanlıdır. Kino tariximizdən bəhs bu ilk fundamental çoxcildli nəşr milli kinematoqrafiya yaranandan bəri günümüzədək 200 illik bir dövrü (1898-2018-ci illər) əhatə edir. Monoqrafiyada təkcə kinofilm istehsalı deyil, kinotexnikanın, kinoprokatın, kinolaşdırmanın, eləcə də ekran sənətinin bütün sahələrinin inkişafı izlənilir və Azərbaycan kinosunda xüsusi rolu olan sənət adamlarının tutumlu porterləri yaradılıb.
Görkəmli yazıçı, kinodramaturq, rejissor, təşkilatçı və ictimai xadim, Xalq artisti Həsən Seyidbəylinin anadan olmasının 100 illiyi münasibətilə cənab Prezidentin müvafiq sərəncamına əsasən çap olunmuş “Həsən Seyidbəyli: şəxsiyyət və yaradıcı” adlı nəşrdə rejissorun çoxcəhətli fəaliyyətinə həsr olunmuş məqalələr, filmlərinə yazılmış resenziyalar, çəkiliş məqamlarının kadrarxası və onun şəxsiyyətini xarakterizə edən müsahibələr toplanıb.
Bu nəşrlər kino tarixini tədris edən pedaqoqlar, tələbələr və ekran sənətilə maraqlanan bütün oxucular üçün nəzərdə tutulub.