ADMİU Kitabxana-İnformasiya Mərkəzində universitetin professor-müəllim və tələbə heyəti 205000-dən artıq elektron kitabı əhatə edən və dünyanın ən geniş onlayn beynəlxalq elmi tədqiqatlar və nəşrlər bazası olan EBSCO eBook Akademik Kolleksiyasından istifadə imkanı əldə edib. Azərbaycan Kitabxana İnformasiya Konsorsiumunun təqdim etdiyi kolleksiyadan ödənişsiz istifadə 2022-ci ilin 1 may tarixindən etibarən 3 ay müddətinə ADMİU-nun əsas binasında Kitabxana-İnformasiya Mərkəzinin oxu zalında davam edəcəkdir. İstifadəçilərin burada olan kompüterlərdəki IP ünvanlardan EBSCO bazasına search.ebscohost.com saytından daxil olması mümkündür. Bu zaman saytda Akademik search Premier məlumat bazasına daxil olaraq axtarış sahəsində açar sözləri daxil edib PDF şəklində 4500 jurnal, 1000-dən çox kitabın tam mətnlərini əldə etmək olar. Bazada mədəniyyət və incəsənət sahələrinə aid olan 10 mindən çox jurnal məqaləsi yerləşdirilib.
Məlumat bazasında bütün elektron kitablar qeyri-məhdud sayda istifadəçi üçün əlçatandır və yeni nəşrlər mütəmadi olaraq kolleksiyaya əlavə olunur. Geniş mövzu və fənləri, aparıcı akademik və universitet nəşriyyatlarının kitablarından ibarət kolleksiyanın rahat istifadəçi interfeysi onu kitabxanalar üçün əsas elektron resurs bazasına çevirir. Qeyd edək ki, EBSCO nəşrlərindən istifadə etmək üçün oxuculardan xarici dil bigiləri tələb olunur. Burada materiallar ingilis, fransız, ispan, alman, italyan və s. dillərdə təqdim edilir.
EBSCO eBook Academic Collection etibar edə biləcəyiniz yüksək keyfiyyətli və relevant kontentdir. Bu baxımdan şübhəsiz ki, elmi resursların əlaqələndiricisi kimi dünyada aparıcı mövqeyə malik EBSCO ilə əməkdaşlıq ADMİU əməkdaşlarının elmi potensialının dünya elminə inteqrasiyası və inkişafına müsbət təsir göstərəcəkdir.