Gürcüstanın “The Movement” Teatrının bədii rəhbəri ADMİU-da ustad dərsi keçib

25-29 noyabr 2024-cü il tarixlərində Gürcüstanın “The Movement” Teatrının bədii rəhbəri İoseb Bakuradze Azərbaycan Dövlət Mədəniyyət və İncəsənət Universitetinin (ADMİU) SABAH Mərkəzi və Teatr sənəti fakültəsinin tələbələri üçün “Səhnə hərəkəti” üzrə ustad dərsləri keçib.

Beş gün ərzində davam edən ustad dərslərinin yekunu kimi noyabrın 29-da dərslərdə iştirak edən SABAH Mərkəzi və Teatr sənəti fakültəsinin tələbələrinin ifasında eskiz tamaşa təqdim olunub. Tamaşada ADMİU-nun rektoru professor Ceyran Mahmudova, Teatr sənəti fakültəsinin dekanı dosent Kəmalə Mehdiyeva, SABAH Mərkəzinin rəhbəri Əməkdar artist Nofəl Vəliyev və digər universitet əməkdaşları, tələbələr iştirak ediblər.

İ.Bakuradze ustad dərslərinə yaratdığı şəraitə görə rektor C.Mahmudovaya təşəkkür edib, burada olmaqdan məmnunluğunu dilə gətirib.

Tamaşadan sonra rektor C.Mahmudova qonaq pedaqoqa və tələbələrə öz təşəkkürünü bildirib, xarici mütəxəssislərə bu cür pedaqoji və yaradıcı əlaqələrin tələbələrin bilik və bacarıqlarının artırılmasındakı önəmini vurğulayıb.