ADMİU-da akademik Y.Məmmədəliyevin 120 illik yubileyinə həsr olunmuş tədbir keçirilib
Azərbaycan Dövlət Mədəniyyət və İncəsənət Universitetində (ADMİU) görkəmli alim, akademik Yusif Məmmədəliyevin 120 illik yubileyinə həsr olunmuş tədbir keçirilib.
Tədbiri giriş sözü ilə açan ADMİU-nun Elm və yaradıcılıq işləri üzrə prorektoru dosent Sədaqət Əliyeva qeyd edib ki, tədbirin keçirilməsi Azərbaycan Respublikasının Prezidenti İlham Əliyevin Yusif Məmmədəliyevin anadan olmasının 120 illiyi ilə bağlı imzaladığı sərəncama əsaslanır. O, akademik Yusif Məmmədəliyevin elmi irsinin Azərbaycan kimya elminin inkişafındakı rolundan danışaraq bildirib ki, akademik Yusif Məmmədəliyevin yalnız Azərbaycan elminin deyil, həmçinin dünya kimya elminin inkişafında müstəsna xidmətləri olub. Onun elmi fəaliyyəti neft-kimya sahəsində fundamental tədqiqatların əsasını qoyub, respublikamızda bu istiqamətdə elmi məktəbin formalaşmasına və beynəlxalq elmi nüfuzun artmasına ciddi töhfə verib. Eyni zamanda S.Əliyeva kimya elmi ilə mədəniyyətin, incəsənətin əlaqələrindən də danışaraq, bu xüsusda Y.Məmmədəliyevin elmi kəşflərinin incəsənətə də təsirsiz ötüşmədiyini vurğulayıb.
Tədbirdə akademik Yusif Məmmədəliyevin həyat və fəaliyyətinə həsr olunmuş videoçarx nümayiş etdirilib.
Neft-Kimya Prosesləri İnstitutunun baş direktoru akademik Vaqif Abbasov akademik Yusif Məmmədəliyevin elmi irsi barədə geniş məruzə ilə çıxış edib. O, görkəmli alimin XX əsr kimyasına verdiyi töhfələri, xüsusilə də neft-kimya proseslərinin elmi əsaslarının yaradılması, kataliz və üzvi sintez sahəsində apardığı fundamental tədqiqatların müasir elmin inkişafına açdığı yol haqqında danışıb. Qeyd edib ki, Yusif Məmmədəliyev tərəfindən neft karbohidrogenlərinin çevrilmə mexanizmlərinin müəyyən edilməsi, həmçinin yüksək oktanlı benzin alınmasına dair araşdırmalar təkcə Azərbaycan elmi üçün deyil, dünya neft sənayesi üçün strateji əhəmiyyət daşıyır. Məruzəçi alim, həmçinin Y.Məmmədəliyevin kəşflərinin, kimya sahəsindəki fəaliyyətinin nəticələrinin bu gün və bundan sonra da incəsənət, mədəniyyət sahəsindəki tətbiqlərindən danışıb, bu baxımdan Mədəniyyət və İncəsənət Universitetində onun xatirəsinə həsr olunmuş tədbiri əlamətdar hesab edib.
