ADMİU-nun əməkdaşı Toğrul Qasımov Qırğızıstanın Bişkek şəhərində keçirilən “Manas” Günlərində iştirak edib
Azərbaycan Dövlət Mədəniyyət və İncəsənət Universitetinin (ADMİU) Yaradıcılıq layihələrin idarə olunması şöbəsinin mütəxəssisi Toğrul Qasımov Qırğızıstanın paytaxtı Bişkek şəhərində keçirilən “Manas” günlərində universitetimizi təmsil edib.
30 noyabr- 6 dekabr tarixlərində “Manas” günləri çərçivəsində keçirilən tədbirlərdə və tamaşalarda iştirak edən T.Qasımov Manas teatrını ziyarət edib, teatrın direktoru Nurbek Talantbekovla görüşüb. Eyni zamanda Qırğızıstan-Türkiyə Manas Universiteti Gözəl sənətlər fakültəsində qonaq olan əməkdaşımız fakültənin dekanı professor Kürşad Gülbəyazla həmsöhbət olub.
Toğrul Qasımov, həmçinin, “Manas” günləri çərçivəsində Bişkek şəhərində B.Beyşanaliyev adına Qırğızıstan Dövlət Mədəniyyət və İncəsənət Universitetinin Tədris işləri üzrə prorektoru Cakıpov Kubatbek Kulançiyeviç və İncəsənət fakültəsinin dekanı Kaziyeva Sozul Murzabekova ilə görüşüb, sözügedən fakültənin tədris mühiti ilə yaxından tanış olub.
T.Abdumomunov adına Qırğızıstan Milli Akademik Dram Teatrı nəzdində Teatr Kollecinin qonağı olarkən Qırğızıstan Respublikasının Xalq artisti, professor Turqanbubu Boobekova, assistentlər – Qırğızıstan Respublikasının Fəxri Mədəniyyət İşçisi Şəkər Joomartova və Aycamal Masılbekova, Qırğızıstan Respublikasının Fəxri Mədəniyyət İşçisi Janılay İsakova kimi pedaqoqlarla görüşərək dərslərində iştirak edib.
Görüş zamanı Teatr Kollecinin direktoru Kurmanzhan Adylbekova T.Qasımovu diplomla təltif edib, ona Qırğızıstanın tarixini və mədəni irsini özündə əks etdirən xatirə hədiyyələri təqdim edib. Təltif zamanı K.Adylbekova bu ilin may ayında festival çərçivəsində Azərbaycana səfər etdiyini xatırlayıb və Azərbaycan Dövlət Mədəniyyət və İncəsənət Universitetinin rektoru professor Ceyran Mahmudova başda olmaqla, universitet əməkdaşlarının yüksək qonaqpərvərliyindən söz açıb. O, rektor Ceyran Mahmudovaya öz salam və hörmətlərini çatdırıb, gözəl layihələrdə yenidən görüşəcəklərinə ümid etdiyini vurğulayıb.
Dekabrın 4-də Bişkek şəhərində “Manas” günlərinin möhtəşəm bağlanış mərasimi keçirilib. Mərasimdə Qırğızıstan Prezidentinin Müşaviri Syünbek Kasmambetov, Qırğızıstan Mədəniyyət və idman naziri, Qırğızıstan Parlamentinin üzvləri və digər nüfuzlu şəxslər iştirak ediblər.
