ADMİU-nun dosenti Türkiyədə ustad dərsi keçib
Azərbaycan Dövlət Mədəniyyət və İncəsənət Universitetinin (ADMİU) Keyfiyyət təminatı və strateji planlama departamentinin müdir müavini, Teatrşünaslıq kafedrasının dosenti Elçin Cəfərov Türkiyənin İstanbul şəhərində işgüzar səfərdə olub. Səfər çərçivəsində “Film heç bitməsin” beynəlxalq film festivalına hazırlıq məsələləri, ADMİU və Nişantaşı Universitetinin birgə həyata keçirməyi planlaşdırdığı “Teatr və kino yaradıcılığı üçün Süni intellekt – tədqiqat və analiz platforması” layihəsi, eləcə də dekabr ayında keçirilməsi nəzərdə tutulan Çingiz Aytmatov yaradıcılığına həsr olunmuş forum haqqında müzakirələr baş tutub.
ADMİU ilə İstanbul Nişantaşı Universiteti arasında imzalanmış əməkdaşlıq memorandumu çərçivəsində E.Cəfərov İncəsənət və Dizayn fakültəsinin tələbələri üçün ustad dərsləri keçib. Ustad dərslərinin moderatoru İstanbul Nişantaşı Universitetinin İncəsənət və Dizayn fakültəsinin Radio, Kino və Televiziya bölməsinin rəhbəri Burcu Kurtiş olub.
Ustad dərsləri çərçivəsində dosent Elçin Cəfərov teatr və kino sənətinin müxtəlif istiqamətlərinə dair öz fikirlərini bölüşüb. O, “Azərbaycan rejissor sənəti” mövzusunda Azərbaycan incəsənətində rejissor sənətinin mahiyyəti, yaradıcılıq konsepsiyaları və müasir kino mühitinin tələbləri barədə məlumat verib. Daha sonra “Suni intellekt və teatr” və “Rəqəmsallaşma və teatr” mövzularında teatr sənətində süni intellektin və rəqəmsal texnologiyaların tətbiqi, virtual alqoritmlərin bədii ifadə vasitələrinə təsiri ilə bağlı nəzəri və praktiki nümunələr təqdim edib.
Bundan əlavə, “Azərbaycanda konseptual rejissor sənəti: Vaqif İbrahimoğlu” mövzusunda Azərbaycanın konseptual teatr məktəbinin əsas xüsusiyyətləri, Vaqif İbrahimoğlunun yaradıcılıq dünyası və rejissor yanaşmasının özünəməxsusluğu tələbələrə çatdırılıb. Ustad dərsləri “Teatr və ritual” mövzusu ilə davam edib və burada teatrın ritual kökləri və bu əlaqənin çağdaş teatrda necə təzahürünü tapdığı geniş şəkildə müzakirə olunub.
Tələbələrin fəal iştirakı ilə keçən ustad dərsləri çərçivəsində E.Cəfərov müasir teatr və kino sənətinin inkişaf istiqamətləri barədə öz təcrübəsini bölüşüb, tələbələri maraqlandıran sualları cavablandırıb.
