ADMİU-nun Elmi Şurasının növbəti iclası…

Azərbaycan Dövlət Mədəniyyət və İncəsənət Universitetinin (ADMİU) Elmi Şurasının növbəti iclası keçirilib.

İclasın əvvəlində Kitabxana-informasiya mərkəzinin illik hesabatı dinlənilib.

Daha sonra Elm və yaradıcılıq işləri üzrə prorektor, dosent Sədaqət Əliyeva ADMİU-nun professor-müəllim heyətinin 2025-ci il üçün elmi-tədqiqat işlərinin yekun hesabatını məruzə edib.

İclas cari məsələlərlə davam edib.

Cari məsələlərdə Azərbaycan Respublikasının Prezident Aparatından daxil olmuş “Birləşmiş Millətlər Təşkilatının Ümumdünya Şəhərsalma Forumunun On üçüncü sessiyası haqqında məlumat və ADMİU-nun nəzərdə tutulan ƏSAS, YAN və DİGƏR tədbirlər siyahısı ilə” bağlı ADMİU-nun tədbirlər planının təsdiqi ilə bağlı prorektor S.Əliyevanın məruzəsi dinlənilib.

Qeyd olunub ki, 2026-cı ildə Azərbaycanın paytaxtı Bakı şəhəri dünyanın aparıcı şəhərsalma mütəxəssislərini və beynəlxalq təşkilatların yüksək nümayəndələrini bir araya gətirəcək. Birləşmiş Millətlər Təşkilatının (BMT) İnsan Məskənləri Proqramı – UN-Habitat tərəfindən keçirilən Ümumdünya Şəhər Forumu – WUF13 ilk dəfə olaraq ölkəmizdə təşkil olunacaq.

Forumun tədbirlər planına Azərbaycan üzrə cəmi iki universitet cəlb olunub ki, onlardan biri Azərbaycan Dövlət Mədəniyyət və İncəsənət Universiteti, digəri isə Azərbaycan Memarlıq və İnşaat Universitetidir.

WUF13 Forumunun 2026-cı il mayın 17-dən 22-dək keçirilməsi nəzərdə tutulur. Forumun builki devizi – “Dünyada yaşayış: Təhlükəsiz və möhkəm şəhərlər və icmalar” – çağdaş dünyanın üzləşdiyi əsas problemlərdən biri olan sürətli urbanizasiyanın fəsadlarına qarşı birgə yanaşmaların müəyyənləşdirilməsinə xidmət edəcək.

S.Əliyeva onu da qeyd edib ki, Ümumdünya Şəhər Forumu ilk dəfə 2002-ci ildə Keniyanın Nayrobi şəhərində keçirilib və sonrakı illərdə Braziliya, İspaniya, Çin, Kolumbiya, Malayziya və digər ölkələr ev sahibliyi ediblər. Bu Forumun Bakıda keçirilməsi Azərbaycanın beynəlxalq nüfuzunun göstəricisidir və ölkəmizin urbanizasiya sahəsində qazandığı uğurların beynəlxalq miqyasda tanınmasının daha bir sübutudur.

Daha sonra iclas digər cari məsələlərlə davam etdirilib.