ADMİU “UI Greenmetric 2024” dünya universitetlərinin reytinq siyahısında yer alıb
ADMİU ilk dəfə iştirak etdiyi bu reytinqdə 95 ölkənin nüfuzlu ali təhsil müəssisəsələri arasında 1247-ci yeri tutaraq, ətraf mühitə davamlı yanaşma istiqamətində öz mövqeyini təsdiqləyib. Qiymətləndirmə aparılarkən universitetin ətraf mühitə münasibəti, enerjidən istifadə və onun iqlimə təsiri, kampus ərazisində kağızlardan istifadənin azaldılması siyasəti, su resurslarından rasional qaydada istifadə olunması, ali məktəb ərazisində nəqliyyatdan (ictimai, şəxsi avtomobillər və ya velosiped) istifadə, ekoloji problemlər üzrə tədris kurslarının təşkili, ekoloji problemlərin öyrənilməsi istiqamətində tədqiqatçılıq fondlarının olması, ekoloji problemlərə dair dərc olunmuş elmi məqalələrin sayı və s. təhlil olunub.
Nəzərinizə çatdıraq ki, “UI Green Metric World University Ranking” ekologiya sahəsini əhatə edən yeganə beynəlxalq reytinq sistemidir və ətraf mühitin çirklənməsi problemlərinin aradan qaldırılmasına töhfə verməyi hədəfləyir. Bu platformanın əsas məqsədi akademik cəmiyyəti reytinqdə iştiraka cəlb etməklə ekoloji tarazlığın qorunmasına və ekoloji problemlərin həllinə nail olmaqdır.
