Akademik Yusif Məmmədəliyevə həsr olunmuş elmi seminar keçirilib

Azərbaycan Dövlət Mədəniyyət və İncəsənət Universitetinin (ADMİU) Kulturologiya fakütəsində görkəmli alim və ictimai xadim, Azərbaycan Respublikası Elmlər Akademiyasının təşkilatçılarından biri, SSRİ Elmlər Akademiyasının müxbir üzvü, SSRİ Dövlət mükafatı laureatı, Əməkdar elm xadimi, kimya elmləri doktoru, akademik Yusif Heydər oğlu Məmmədəliyevə həsr olunmuş elmi seminar keçirilib.
“Akademik Yusif Məmmədəliyevin 120 illiyinin qeyd edilməsi haqqında” Azərbaycan Respublikası Prezidentinin 5 iyul 2025-ci il tarixli Sərəncamı çərçivəsində həyata keçirilən tədbiri giriş sözü ilə ADMİU-nun Kulturologiya fakültəsinin dekanı, sənətşünaslıq üzrə fəlsəfə doktoru, dosent Səyavuş Məhişov açaraq alimin şərəfli ömür yolu, elmi, təşkilati və ictimai-siyasi fəaliyyəti barədə seminar iştirakçılarına ətraflı məlumat verib. S.Məhişov bildirib ki, Yusif Məmmədəliyev dünya şöhrətli kimyaçı-alim, elm təşkilatçısı, dövlət xadimi və tarixi şəxsiyyət olmaqla yanaşı, həm də gözəl pedaqoq, maarifçı, Azərbaycan mədəniyyətinin, incəsənətinin və ədəbiyyatının inkişafında əvəzsiz xidmətlər göstərmiş vətənpərvər ziyalılarımızdan biri olub.
Sonra söz məruzəçilərə verilib. ADMİU-nun Kulturologiya fakültəsinin Sosial-siyasi elmlər kafedrasının müdiri, dosent Əfşan Şəfiyeva “Yusif Məmmədliyevin Azərbaycan elminin inkişafında rolu” mövzusunda məruzə ilə çıxış edərək, böyük alimin ən mühüm nailiyyətlərindən biri hesab edilən dünyada ilk dəfə olaraq Azərbaycan neftinin və təbii qazlarının tədqiqindən, onun bu sahədəki dünyamiqyaslı kəşflərindən, o cümlədən, Azərbaycanda elmin inkişafına təkan verən müəssisələrin təşkilindəki xidmətlərindən danışıb.
ADMİU-nun Kulturologiya fakültəsinin Muzeyşünaslıq və turizm kafedrasının baş müəllimi Kəmalə Məmmədova “Yusif Məmmədəliyevin elmi irsinin biblioqrafik mənbələr əsasında bibliometrik təhlili” mövzusunda məruzə ilə çıxış edərək alimin elmi irsinin biblioqrafik metaverilənlərin köməyi ilə kəmiyyət üzrə geniş statistik təhlilini verdi və bu araşdırmanın alimin əsərlərinin elmi məhsuldarlığının qiymətləndirilməsində mühüm əhəmiyyətə malik olduğunu vurğulayıb.
Çıxışçılar- ADMİU-nun Muzeyşünaslıq və turizm kafedrasının müdiri, pedaqogika üzrə fəlsəfə doktoru, dosent Yeganə Eyvazova, ADMİU-nun Muzeyşünaslıq və turizm kafedrasının professoru, kulturologiya elmləri doktoru İlqar Hüseynov, ADMİU-nun Sosial-mədəni fəaliyyət kafedrasının müdiri, sənətşünaslıq üzrə fəlsəfə doktoru, dosent Sevinc Əskərova və başqaları Yusif Məmmədəliyevin həyatı və elmi fəaliyyətindən, onun Azərbaycan elminin inkişafındakı müstəsna xidmətlərindən söz açıblar.
Tədbir Yusif Məmmədəliyevə həsr olunmuş sənədli filmin nümayişi ilə yekunlaşıb.