İnstrumental İfaçılıq Kafedrası

İnstrumental ifaçılığın tədrisi sahəsində özünəməxsus ənənələrə malik olan kafedra müxtəlif illərdə “Musiqi fənləri və dirijorluq”, “İnstrumental ifaçılıq və dirijorluq” adları altında fəaliyyət göstərmişdir.  Kafedraya müxtəlif dönəmlərdə sənətşünaslıq doktoru, professor İradə Köçərli, sənətşünaslıq üzrə fəlsəfə doktoru, professor Aytəkin Həsənova, Əməkdar incəsənət xadimi, sənətşünaslıq üzrə fəlsəfə doktoru, dosent Sonaxanım İbrahimova, sənətşünaslıq üzrə fəlsəfə doktoru, dosent Səbinə Mehdiyeva, sənətşünaslıq üzrə fəlsəfə doktoru, dosent Cəmalə Nəsirova rəhbərlik etmişlər. 2024-cü ildən həmin vəzifəni Əməkdar müəllim, sənətşünaslıq üzrə fəlsəfə doktoru, professor Adilə Yusifova icra edir.

Bütün fəaliyyətini müasir musiqi pedaqogikasının nəzəri-metodoloji bazası əsasında quran kafedrada fortepiano ilə yanaşı violin, viola, gitara, klarnet, saksofon, fleyta və zərb alətləri üzrə yüksək ixtisaslaşmış kadrlar yetişdirilir. Gənc ifaçıların professional baxımdan inkişafında

müsabiqələrin rolunu nəzərə alan kafedra bütün fəaliyyəti boyu müvafiq tədbirlərin təşkilinə böyük önəm vermişdir. Belə ki, Ümummilli lider H.Əliyevin 90 illik yubileyinə həsr olunmuş “Ali təhsil müəssisələrinin tələbələri arasında musiqi ifaçılarının müsabiqəsi” (2013), Heydər Əliyevin anadan olmasının 94 illiyi münasibətilə keçirilən Musiqi sənəti fakültəsinin bakalavr və magistr pillələrində təhsil alan tələbələrin I elmi-ifaçılıq konfrası (2017), “Sürət və cürət” I Etüd müsabiqəsi (2018), “Musiqi müəllimi” ixtisası üzrə təhsil alan tələbələrin “Gələcəyin müəllimi” müsabiqələri (2019, 2023) və s. tədbirlər tələbələrin ifaçılıq qabiliyyətinin inkişafına və yaradıcılıq imkanlarının genişlənməsinə xidmət etmişdir. Təqdirəlayıqdir ki, ifaçılıq ixtisası üzrə təhsil alan tələbələr həmçinin xarici ölkələrdə keçirilən müsabiqələrdə iştirak etmişlər. İfaçı tələbələrin Macarıstanın Boloton və Vesperm şəhərlərində “Renessans” başlığı altında keçirilən XV Beynəlxalq müsabiqədə (2015), Golden Autumun İnternational Festivalında (2015), Polşada keçirilən XII “Foundation Benefis” müsabiqəsində (2016), İstanbulda baş tutmuş XIII İnternational Pera Piano Festivalında (2018), Moskvada düzənlənən Beynəlxalq müsabiqədə (2020), “Sing at home” – İtaliya Online Beynəlxalq festivalında (2020), “British Lion” II Beynəlxalq instrumental musiqi müsabiqəsində (2022), Klassik gitara üzrə II Online Beynəlxalq müsabiqəsində (2022) və d. bu kimi tədbirlərdə çıxışları uğurla nəticələnmişdir.

İnstrumental ifaçılıq kafedrası tədris prosesi ilə yanaşı rəngarəng məzmunlu konsertlərin təşkil olunmasına da böyük diqqət ayırır. Vasif Adıgözəlovun 80 illik yubileyi münasibətilə keçirilən tədbir (2015), “Fransız musiqisi” konserti (2016), Beynəlxalq Muğam Mərkəzində UNESCO-nun xətti ilə təşkil olunan Beynəlxalq caz gününə həsr edilmiş konsert (2016), Azərbaycan Dövlət Filarmoniyasında Teymur Göyçayevin rəhbərliyi altında Qara Qarayev adına Azərbaycan Dövlət Kamera Orkestrinin müşayiətilə İnstrumental ifaçılıq kafedrasın müəllim və tələbələrinin konserti (2017), Beynəlxalq Muğam mərkəzində Q.Qarayevin 100 illiyi ilə əlaqədar konsert (2018), Azərbaycanda Macarıstan günləri çərçivəsində İnstrumental ifaçılıq kafedrasının tələbələrinin “Paralel dünyalar” konserti (2022), “Şuşa” ilinə həsr olunmuş “Mənim Şuşam” adlı konsert (2022), Tələbə Kamera Orkestrinin “QaynaQ” adlı konserti (2022), “Sehrli simlər” ansamblının konserti (2023), Raul Hüseynovun “Ustaddan tələbəyə” adlı portret-konserti (2024) və s. tədbirlər kafedranın yaradıcılıq potensialının parlaq təzahürüdür.

Kafedra əməkdaşlarının zəngin təcrübəsi musiqi pedaqogikasının müasir prinsiplərinə əsaslanan tədris vəsaitlərində öz əksini tapmışdır. Professor Aytəkin Həsənovanın müxtəlif ixtisaslar üçün nəzərdə tutulan “Ümumi fortepiano” fənni üzrə müntəxəbatı, dosent Cəvahir Mustafayevanın “Azərbaycan bəstəkarlarının fortepiano əsərlərində proqramlılıq” adlı dərs vəsaiti böyük maraq kəsb edir.