“Sazlı, sözlü Göyçəm” adlı konsert keçirilib

Rəşid Behbudov adına Azərbaycan Dövlət Mahnı Teatrında Azərbaycan Dövlət Mədəniyyət və İncəsənət Universitetinin (ADMİU) Musiqi sənəti fakültəsinin Aşıq sənəti kafedrası tərəfindən hazırlanmış “Sazlı, sözlü Göyçəm” adlı konsert keçirilib.

Qərbi Azərbaycanın aşıq sənəti irsinin daha geniş tanıdılmasına həsr olunmuş konsertdə ADMİU rəhbərliyi, tanınmış mədəniyyət xadimləri, incəsənət nümayəndələri, saz sənətini sevərlər iştirak ediblər.

ADMİU-nun professoru, Əməkdar artist Azad Şükürovun aparıcılığı ilə keçən konsert proqramında Aşıq sənəti kafedrasının müdiri, Əməkdar mədəniyyət işçisi, sənətşünaslıq üzrə fəlsəfə doktoru Aşıq Samirə Əliyeva, dosentlər Hafiz Kərimov, Fəzail Orucov, Nemət Qasımov, Altay Məmmədov, ADMİU-nun müəllimi, “Beynəlxalq Baxşı festivalı” Qran Pri mükafatçısı Qəlbinur İbrahimli, onların tələbələri və əslən Qərbi Azərbaycandan olan məzunlar çıxış ediblər. Onların ifasında Qərbi Azərbaycan coğrafiyasına məxsus toponimlərlə bağlı, eləcə də Qərbi Azərbaycan aşıq məktəbinin ustad nümayəndələrinin adları ilə bağlı aşıq havaları və bir neçə dastandan maraqlı hissələr təqdim olunub.

Azərbaycan aşıq sənətini, xüsusən Qərbi Azərbaycan aşıq məktəbini bir daha sənətsevərlərə təqdim edən “Sazlı, sözlü Göyçəm” konsertinin bədii rəhbəri Əməkdar mədəniyyət işçisi, sənətşünaslıq üzrə fəlsəfə doktoru Aşıq Samirə Əliyevadır.