Dram Rejissoru və Səhnə Plastikası Kafedrası

İnstitutda aktyorluq, rejissorluq və teatrşünaslıq istiqamətləri üzrə mütəxəssis hazırlığına başlanılmışdır. Tədris prosesinə Aleksandr Tuqanov, Rza Təhmasib, Kazım Ziya, Əli Sultanlı, Mikayıl Rəfili, Fuad Qasımzadə, Almurad Muradov və digər tanınmış teatr xadimləri, alimlər və pedaqoqlar cəlb olunmuşlar.

1946–1947-ci illərdə görkəmli rejissorlar Ədil İsgəndərov, Mehdi Məmmədov və Məhərrəm Haşımov institutda pedaqoji fəaliyyətə başlamışlar. Əsas ixtisas fənlərini birləşdirən kafedraya xalq artisti Rza Təhmasib rəhbərlik etmişdir. 1948-ci ildə “Rejissorluq” kafedrası müstəqil struktur kimi fəaliyyət göstərməyə başlamışdır. Bu hadisə Azərbaycanda peşəkar teatr rejissorlarının ali təhsil səviyyəsində hazırlanmasının inkişafında mühüm mərhələ olmuşdur.

1945-ci ildə rejissorluq ixtisası üzrə 15 nəfər tələbə qəbul edilmişdir. Sonrakı illərdə bu istiqamət üzrə kadr hazırlığı genişlənmiş, institutun məzunları Azərbaycan teatr sənətinin inkişafında mühüm rol oynamışlar. Onların arasında xalq artisti Gülcahan Güləhmədova, əməkdar incəsənət xadimləri Ulduz Əliyeva, Əşrəf Quliyev, Yusif Bağırov, Nəsir Sadıqzadə, Rüfət Şabanov və Adil Babayev kimi tanınmış sənətkarlar yer alırlar.

İnstitutun müxtəlif illərdə rejissorluq ixtisasını bitirmiş məzunları sırasında Fikrət Sultanov, Zəminə Hacıyeva, Azər Paşa Nemətov, Yusif Əkbərov, Fuad Hacıyev, Rafiq Atakişiyev, Vaqif Şərifov, Zülfüqar Abbasov, Əliqismət Lalayev, İranə Tağızadə, Bəhram Osmanov, Mehriban Ələkbərzadə və Firudin Məhərrəmov da vardır. Onların yaradıcılıq fəaliyyəti Azərbaycan teatr rejissorluğunun inkişafına əhəmiyyətli töhfələr vermişdir.

Kafedraya müxtəlif illərdə Mehdi Məmmədov, Fikrət Sultanov, Ağakişi Kazımov, Bəhram Osmanov, Sevda Teymurova və İsrafil İsrafilov rəhbərlik etmişlər.

Kafedranın tarixində digər mühüm mərhələ 1968-ci ildə “Səhnə hərəkəti” kafedrasının yaradılması olmuşdur. Kafedra səhnə hərəkəti və plastika sahələri üzrə tədrisin təşkili, gələcək teatr mütəxəssislərinin fiziki ifadə imkanlarının, səhnə davranışı və hərəkət mədəniyyətinin inkişafı istiqamətində fəaliyyət göstərmişdir. 2002-ci ilə qədər “Səhnə hərəkəti” adı ilə fəaliyyət göstərən kafedra 2006-cı ildən “Xoreoqrafiya sənəti və səhnə plastikası” adlandırılmışdır. Bu dəyişiklik onun fəaliyyət istiqamətlərinin xoreoqrafiya və səhnə plastikası sahələrini də əhatə etməsi ilə bağlı olmuşdur.

2017-ci ildə “Dram rejissoru” və “Xoreoqrafiya sənəti və səhnə plastikası” kafedraları birləşdirilərək “Dram rejissoru və səhnə plastikası” kafedrası yaradılmışdır. Bu birləşmə rejissorluq, səhnə hərəkəti, xoreoqrafiya və səhnə plastikası istiqamətlərinin vahid tədris və yaradıcılıq müstəvisində əlaqələndirilməsinə imkan yaratmışdır. Beləliklə, rejissorluq sənətinin nəzəri və praktiki əsasları ilə səhnə hərəkəti və plastika vasitələrinin qarşılıqlı əlaqəsi kafedranın fəaliyyətinin əsas istiqamətlərindən birinə çevrilmişdir.

Hazırda “Dram rejissoru və səhnə plastikası” kafedrasına Əməkdar incəsənət xadimi, dosent Hafiz Quliyev rəhbərlik edir. Kafedranın professor-müəllim heyəti tədris və yaradıcılıq fəaliyyəti vasitəsilə milli teatr ənənələrinin qorunmasına, inkişafına və müasir teatr sənətinin tələblərinə cavab verən mütəxəssislərin hazırlanmasına töhfə verir.

Kafedrada Əməkdar incəsənət xadimi, pedaqogika üzrə fəlsəfə doktoru, məsləhətçi-professor Fikrət Sultanov, sənətşünaslıq üzrə fəlsəfə doktoru, dosent Əsəd Rzayev, Əməkdar incəsənət xadimi, dosent Bəhram Osmanov, Əməkdar incəsənət xadimi, Naxçıvan MR-in Əməkdar incəsənət xadimi, sənətşünaslıq üzrə fəlsəfə doktoru, dosent Əliqismət Lalayev, sənətşünaslıq üzrə fəlsəfə doktoru, dosent Ofeliya Zeynalova, dosent Sahib Novruzov, Əməkdar mədəniyyət işçisi, baş müəllim Esmiralda Osmanova, baş müəllim Gümrah Ömərov, Əməkdar artist, müəllim Nigar Şahmuradova, müəllimlər Mirzə Abasov, Hilal Dəmirov, Nurlan Rüstəmov, Tural Mustafayev və Elnur İsmayılov, Lamiyə İsrafilova, konsertmeysterlər Zülfiyyə Muxtarova və Səriyyə İsayeva, eləcə də böyük laborant Lamiyə İsrafilova fəaliyyət göstərirlər.

Kafedranın professor-müəllim heyəti 18 nəfərdən ibarətdir. Heyətdə 1 məsləhətçi-professor), 6 dosent, 2 baş müəllim və 7 müəllim, 2 konsertmeyster fəaliyyət göstərir.

Əmək fəaliyyətinin təşkili və ştat bölgüsünə görə, 5 nəfər tam ştat vahidi, 3 nəfər 0,5 ştat vahidi, 5 nəfər 0,5 ştat vahidi üzrə əvəzçiliklə, 3 nəfər isə saathesabı əsaslarla çalışır. Bundan əlavə, 2 nəfər 0,5 ştat vahidi üzrə əvəzçiliklə konsertmeyster vəzifəsini yerinə yetirir.

Kafedranın əsas məqsədi yüksək peşə hazırlığına və yaradıcı təfəkkürə malik teatr mütəxəssisləri yetişdirmək, rejissorluq sənətinin nəzəri və praktiki əsaslarını mənimsətmək, səhnə hərəkəti və plastika sahələrinin ifadə imkanlarını inkişaf etdirmək, milli teatr ənənələrini müasir yaradıcılıq təcrübəsi ilə uzlaşdırmaqdır.