Beynəlxalq Layihələr və Əcnəbilərlə İş Şöbəsi

Universitetin xarici siyasətini həyata keçirən əsas struktur kimi ADMİU-nun Beynəlxalq prorektorluğunun tərkibində 2000-ci ildən “Beynəlxalq əlaqələr şöbəsi” fəaliyyətə başlamış, 2015-ci ildən universitetdə təhsil alan əcnəbi tələbələrə nəzarət və onların idarəedilməsi strukturun fəaliyyət istiqamətlərinə daxil olduğu üçün şöbənin adı dəyişdirilərək “Beynəlxalq əlaqələr və əcnəbi tələbələrlə iş şöbəsi” adı altında fəaliyyət göstərmiş, 2023-cü ildən isə universitetin beynəlxalq arenada layihələr üzrə fəaliyyətlərini nəzərə alaraq “Beynəlxalq layihələr və əcnəbilərlə iş şöbəsi” adlandırılmışdır. Beynəlxalq layihələr və əcnəbilərlə iş şöbəsi universitetin fəaliyyət istiqamətinə uyğun olaraq beynəlxalq təcrübənin tətbiqi imkanlarının araşdırılması, yerli və xarici müəssisələrlə, beynəlxalq təşkilatlarla əməkdaşlıq edərək müxtəlif layihələrin işlənməsi və icrasını təmin edir. Layihə və qrant sahəsində qabaqcıl yerli və beynəxalq təcrübənin öyrənilməsi, qrant müsabiqə və beynəlxalq layihələrdə universtetin pofessor-müəllim, tələbə, inzibati heyətin məlumatlandırma işinin təşkili, potensialının artırılması, iştiraklarının təmin edilməsi də Beynəlxalq layihələr və əcnəbilərlə iş şöbəsinin prioritetlərindən sayılır.

Şöbənin qarşısında duran öhdəliklərdən biri də universiteti, onun struktur bölmələrini, inzibati və akademik heyətini, tələbələrini beynəlxalq layihə və qrantlarda uğurlu iştirakı üçün potensialın artırılması məqsədilə layihələrin idarəedilməsi və digər əlaqəli mövzular üzrə təlimlərin keçirilməsini təşkil etməkdir.

Beynəlxalq layihələr və əcnəbilərlə iş şöbəsi (bundan sonra – Şöbə adlandırılacaq) Azərbaycan Dövlət Mədəniyyət və İncəsənət Universiteti (bundan sonra – Universitet adlandırılacaq) beynəlxalq layihələr və əcnəbilərlə bağlı fəaliyyətini heyata keçirir və vəzifə bölgüsünə görə Universitetin Beynəlxalq əlaqələr üzrə prorektoruna tabedir.

Şöbə öz fəaliyyətində Azərbaycan Respublikasının Konstitusiyasını, Azərbaycan Respublikasının “Təhsil haqqında”, “Elm haqqında” Qanunlarını, Azərbaycan Respublikası Prezidentinin fərman və sərəncamlarını, Azərbaycan Respublikası Nazirlər Kabinetinin qərar və sərəncamlarını, Elm və Təhsil Nazirliyinin əmr, təlimat və Kollegiya Qərarlarını, digər müvafiq qanunvericilik aktlarını, ADMİU-nun Nizamnaməsini, Elmi Şuranın qərarlarını, təhsil, elm və innovasiyalar, inzibat-iqtisadi və sosial fəaliyyət sahələrində mövcud olan müvafiq normativ-hüquqi aktları, rektorun əmrlərini və Şöbənin Əsasnaməsini rəhbər tutur.

Yuxarıda qeyd olunan vəzifələrlə yanaşı şöbəyə dair elektron bazanın yaradılması, müvafiq məlumatların elektron bazaya daxil edilməsi, bazanın yenilənməsi; universitetdə və universitetdən kənarda keçirilən görüşlərdə, tədbir və ya seminarlarda iştirak, keçirilən tədbirlərin mətbuatda işıqlandırılmasının təşkili prosesini də şöbənin fəaliyyət istiqamətlərindən biri kimi qeyd etmək olar. Hal-hazırda Beynəlxalq layihələr və əcnəbilərlə iş şöbəsinin müdiri Namiq Kərimovdur.

Bundan əlavə, ADMİU beynəlxalq proqram və layihələr sahəsində də fəaliyyət göstərir. Belə ki, 2023-cü ildə ADMİU-nun Erasmus+Jean Monnet Modulu çərçivəsində təqdim etdiyi “Avropa İttifaqında incəsənət və siyasətin kəsişməsinin tədqiqi” adlı layihəsi Avropa Komissiyası tərəfindən maliyyələşdirilmişdir. Modul incəsənət və siyasət arasındakı əlaqənin tarixi, mədəni və sosial kontekstlər tərəfindən formalaşan mürəkkəb və çoxşaxəli əlaqələrinə istinad edir. Layihə çərçivəsində ADMİU Avropa İttifaqına üzv dövlətlərin bu əlaqələri araşdırmaq istiqamətində əldə etdikləri unikal təcrübəni öyrənməyi və tədris prosesinə tətbiq etməyi hədəfləyir. Bundan əlavə, modulun tətbiqi tələbələrin tədqiqat bacarıqlarını və tənqidi düşünmə qabiliyyətlərinin inkişafına da töhfə verir. Layihənin koordinatoru Namiq Kərimovdur.

Azərbaycan Dövlət Mədəniyyət və İncəsənət Universiteti “Azərbaycanda Rektorlar Konfransının yaradılması” (ECAR) və “Azərbaycanın Ali Təhsil Müəssisələrində davamlı sahibkarlıq ekosisteminin gücləndirilməsi (ENGAGE)” adlı iki Erasmus+ layihəsində tərəfdaşdır. Avropa Komissiyasının Erasmus+ Ali təhsildə Potensialın Gücləndirilməsi Porqramı Çərçivəsində həyata keçirilən “Azərbaycanda Rektorlar Konfransı” layihəsi çərçivəsində universitetimizin rektor və prorektorları tərəfdaş Avropa rektorlar konfranslarının təcrübəsini öyrənmək məqsədilə Fransa, Belçika, İsveç, Litva və İspaniya universitetlərinə səfər etmişlər. Azərbaycanın Ali Təhsil Müəssisələrində davamlı sahibkarlıq ekosisteminin gücləndirilməsi (ENGAGE) çərçivəsində isə sahibkarlıq fəaliyyətləri, əməkdaşlar innovasiyaların idarə edilməsi, sahibkarlığın kurikuluma inteqrasiyasını gücləndirmək məqsədi ilə Estoniya, İsveç, Portuqaliya, Polşa və İspaniyanın qabaqcıl və prestijli təhsil ocaqlarına səfər ediblər.

Beynəlxalq Layihələr və Əcnəbilərlə İş şöbəsi yarandığın gündən etibarən bir çox Avropa və Türkiyə Universitetləri ilə birgə Erasmus+ KA171 layihələri hazırlamışdır. Eyni zamanda şöbə fəaliyyət planına uyğun olaraq mütəmadi şəkildə Avropa Birliyininə daxil olan dövlətlərin universitetləri ilə tərəfdaşlıq müqavilələri hazırlayaraq Erasmus+ KA2 layihələrində ADMİU-nun iştirakını təmin edir.